Saraton kasalligiga chalingan bemorlarning umrini uzaytirishning innovasion usuli topildi

Oshqozon saratonining tajovuzkor shakllarini davolashga yangi yondashuv ijobiy natijalarni ko‘rsatdi: tajribadagi satri-cel preparati bemorlarga o‘rtacha 40 foizga ko‘proq umr ko‘rishga yordam berdi.

Gap CAR-T immunoterapiyasi – bemorning o‘z hujayralari o‘simtaga qarshi kurashish uchun qayta dasturlashtirilib, organizmga qaytariladigan jarayon haqida bormoqda. Tadqiqot The Lancet jurnalida chop etildi.

Ikkinchi bosqich sinovlari Xitoyda o‘tkazildi va unda oshqozon va oshqozon-qizilo‘ngach birikmasi saratonining ilg‘or shakllari bo‘lgan 156 kishi ishtirok etdi. Ishtirokchilar allaqachon kamida ikkita muvaffaqiyatsiz davolanish kursidan o‘tishgan. Satri-cel olgan guruhda o‘rtacha umr ko‘rish nazorat guruhidagi 5,5 oyga nisbatan o‘rtacha 7,9 oyni tashkil etdi. Bemorlarning 22 foizida o‘smalar sezilarli darajada qisqardi (an’anaviy terapiyada 4 foizga nisbatan) va kasallikning rivojlanishi yarmiga sekinlashdi.

Terapiyaning asosiy nishoni o‘sma o‘sishiga yordam beruvchi CLDN18.2 oqsili edi. Satri-cel uni bloklaydi va immunitet tizimiga kasallik bilan kurashish imkoniyatini beradi. Garchi deyarli barcha bemorlar nojo‘ya ta’sirlarni, shu jumladan qon hujayralari sonining kamayishini boshdan kechirgan bo‘lsa-da, ular boshqarilishi mumkin deb hisoblandi.

Tadqiqotchilar bu kasallikni yakuniy davosi emas, balki saratonning eng og‘ir shakllaridan biriga qarshi kurashda muhim qadam ekanligini ta’kidlamoqda, deb xabar beradi lenta.ru.