Rossiyaning Bryansk viloyatida avtomobil ko‘prigi temiryo‘lga qulashi oqibatida Moskva tomon harakatlanayotgan yo‘lovchi poyezdi relsdan chiqib ketdi

Bryansk viloyati gubernatori Aleksandr Bogomaz hodisa oqibatida hozircha 7 kishi halok bo‘lgani va 69 kishi yaralangani haqida ma’lum qildi.

Rossiya temiryo‘l departamenti xabariga ko‘ra, soat 22:44 da Bryansk oblastidagi Pilshino - Vygonichi bir yo‘lli peregonida “transport faoliyatiga noqonuniy aralashuv natijasida avtomobil ko‘prigining oraliq qurilmasi qulashi oqibatida” Klimovo shahridan Moskvaga yo‘l olgan 86-sonli yo‘lovchi poyezdi lokomotivi va vagonlari ag‘darilib ketgan. Aynan qanday aralashuv yuz berganiga aniqlik kiritilmagan.

Baza va Shot Telegram-kanallari ko‘prik qulashi portlash natijasida sodir bo‘lganini xabar bermoqda. Rasmiylar bu da’volarga izoh bermayapti. Qulagan ko‘prik ustidan o‘tgan A-240 avtotrassasida harakat to‘xtatilgan.