Rossiyaning besh viloyatida migrantlar uchun moslashish markazlari ochiladi

Rossiyaning besh viloyatida migrantlar uchun mamlakatdagi hayot va mehnat qoidalari bo‘yicha bepul ma’ruza kurslariga ega moslashish markazlari ochiladi.

Markazlar Kemerovo viloyati, Xabarovsk o‘lkasi, Yakutiya, Chelyabinsk viloyati va Tataristonda paydo bo‘ladi. Kurslarga ixtiyoriy ravishda qatnashish mumkin.

Dastur migrasiya va mehnat qonunchiligi, javobgarlik, jamiyatdagi xatti-harakatlar normalari, Rossiyaning Markaziy Osiyo bilan munosabatlari tarixi, shuningdek, ekstremizm va terrorizmning oldini olish masalalarini o‘z ichiga oladi.

Kurs davomiyligi bir soatdan bir necha soatgacha, 20-30 daqiqalik bloklarga bo‘lingan.

Materiallar yetakchi universitetlar va ixtisoslashtirilgan idoralar - Ichki ishlar vazirligi, Mehnat vazirligi, Tashqi ishlar vazirligi, Rossotrudnichestvo va boshqalar ishtirokida ishlab chiqilgan.

Tashkilotchilarning qayd etishicha , kurslarning maqsadi migrantlarning rasmiy tuzilmalarga ishonchini oshirishdir.