«Migrant Servis» platformasi direktori Andrey Kladov 2025 yilda Rossiyada qaysi sohalarda migrantlarning xizmatiga talab eng yuqori bo‘lishini ma’lum qildi.
Bular: ishlab chiqarish sektori, qishloq xo‘jaligi hamda qurilish sohasi.
Aytilishicha, qurilish sohasida malakali mutaxassislarning yetishmasligi muammosi 2024 yil davomida rivojlanib bordi, 2025 yilda vaziyat yanada tanglashishi mumkin. Hozirda qurilish sohasining barcha yo‘nalishlarida kadrlar taqchilligi kuzatilmoqda: malakali mutaxassislardan tortib eshik-deraza o‘rnatuvchilar, monolitchilar va shtukaturachilarga talab katta.
Ishlab chiqarish sektorida kadrlar yetishmovchiligi 2024 yil boshidan jiddiy muammoga aylanib, Rossiyadagi kompaniyalarning 85 foizida xodimlar yetishmasligi kuzatildi. 2025 yilda salbiy tendensiya yanada rivojlanib, kompaniyalarning 95 foizi kadrlar muammosiga ro‘baro‘ kelishi mumkin.
So‘nggi yillarda kadrlar borasidagi eng yomon vaziyat qishloq xo‘jaligi sohasida yuzaga kelgan. 2022 yilda ushbu sohada ishchi kuchi yetishmasligi 240 ming nafarni tashkil qilgan bo‘lsa, kelgusi yilda kadrlar taqchilligi 300 ming kishiga yetadi.
