Rossiya va Ukraina yirik asirlar almashinuviga tayyorlanmoqda

Ukraina Milliy xavfsizlik va mudofaa kengashi kotibi Rustem Umerov 1 200 nafar ukrainalikni Rossiya asirligidan ozod qilish bo‘yicha kelishuvlarga erishilganini ma’lum qildi. Bu haqda u Telegramda yozdi.

Umerovning so‘zlariga ko‘ra, Ukraina prezidenti topshirig‘iga ko‘ra, u Turkiya va Birlashgan Arab Amirliklaridagi hamkorlar vositachiligida almashinuv jarayonini tiklash bo‘yicha maslahatlashuvlar o‘tkazgan. Natijada tomonlar 1 200 kishini ozod qilishni nazarda tutuvchi Istanbul kelishuvlarini faollashtirishga kelishib oldilar.

Uning ta’kidlashicha, yaqin orada texnik maslahatlashuvlar bo‘lib o‘tadi, unda prosessual va tashkiliy jihatlar kelishib olinadi. Umerovning ta’kidlashicha, asirlikdan qaytishi kerak bo‘lgan ukrainaliklar Yangi yil va Rojdestvo bayramlarini uyda kutib olishlari uchun ish to‘xtovsiz olib borilmoqda.

11 noyabr kuni Umerov Turkiyaga "ayirboshlash masalasini yechish" uchun kelgan.