Rossiya Ukrainaning Yevropa Ittifoqiga a’zo bo‘lishiga endi rozi bo‘lmaydi

Rossiya Xavfsizlik kengashi raisi o‘rinbosari Dmitriy Medvedevning ta’kidlashicha, Rossiya endi Ukrainaning YEIga a’zo bo‘lishiga toqat qilmaydi, chunki ushbu tashkilot NATO doirasida AQSh bilan nizo fonida o‘z harbiy imkoniyatlarini kuchaytirishga intilmoqda. Shu bilan birga, Medvedev Qo‘shma Shtatlarning NATO'dan chiqishiga ishonmaydi.

"Albatta, hech qanaqa Tramp va Vashington NATOdan chiqmaydi. Bundan ma’no ham yo‘q, Kongress ham yo‘l qo‘ymaydi. Trampning ritorikasi — shunchaki epataj. Garchi Qo‘shma Shtatlar kontingentini kamaytirish yoki nimanidir yetkazib berishni rad etish kabi ramziy harakatlar bo‘lishi mumkin. Bu yerda diqqatga sazovor narsa bu emas. Alyans ichida Eron kampaniyasi tufayli keskinlashgan kuchli ziddiyatlar borligi ayon. Yevropalik siyosiy mahluqlar, ayniqsa Bryusseldagilar, YEI ichida to‘laqonli harbiy komponent yaratish haqida jiddiy o‘ylab qolishdi. Mana shu narsa dunyo manzarasini o‘zgartiradi.

Shu paytgacha bizning Yevropa Ittifoqiga a’zolik borasidagi ritorikamiz barcha qo‘shnilarga, hatto bosqinchi Ukrainaga nisbatan ham vazmin va bosiq edi. Xohlasangiz — qo‘shiling. Lekin endi hamma narsa o‘zgarishi kerak — endi YEI iqtisodiy ittifoq emas. U juda tez orada Rossiyaga nisbatan o‘ta dushman bo‘lgan, ba’zi jihatlardan NATO'dan ham yomonroq to‘laqonli harbiy alyansga aylanishi mumkin. Qo‘shnilarimizning, jumladan 404-mamlakatning (Ukrainaning) harbiy-iqtisodiy Yevropa Ittifoqiga kirishiga nisbatan bag‘rikenglik bilan qarashdan voz kechish vaqti keldi", — deydi Medvedev.