Rossiya Ukrainani zulmatga botirdi

«Ukrenergo» kompaniyasi Rossiya tomonidan energetika infratuzilmasiga uyushtirilgan hujumlardan so‘ng butun Ukraina bo‘ylab favqulodda elektr ta’minoti uzilishlari joriy etilganini ma’lum qildi. Cheklovlar, birinchi navbatda, sanoat va biznesga ta’sir qildi, biroq ayrim hollarda aholi iste’molchilariga ham tegishli bo‘ldi.

DTEK energetika kompaniyasi avvalroq Kiyev, shuningdek, Kiyev va Dnepropetrovsk viloyatlarida favqulodda o‘chirishlar boshlanganini bildirgan edi. Kiyev viloyati ma’muriyati to‘rtta tumanda vayronagarchiliklar yuz berganini ma’lum qildi — xususiy uylar, avtomobillar, omborxonalar va ishlab chiqarish sexlari zarar ko‘rgan. Borispol tumanida bir kishi jarohatlandi. Muhim infratuzilmaga zarba yetmagani qayd etilgan.

Zaporojiye viloyatida dronlar omborxonalarga zarar yetkazdi va yong‘inlar kelib chiqdi, biroq jabrlanganlar yo‘q. Xarkov shahrida hujumlar Xolodnogorsk va Saltov tumanlariga qaratilgan: 14 ta xususiy uy zarar ko‘rgan, bir nechta ayol tibbiy yordam so‘rab murojaat qilgan. Viloyatda esa omborxona va ma’muriy binolar, shuningdek, avtomobillar shikastlangan.

Sum viloyatida dron texnik xizmat ko‘rsatish stansiyasi va avtomobillarga zarar yetkazgan, Poltava viloyatida esa xususiy uyga zarar yetgan. Xerson shahrida qisman elektr ta’minoti uzilgan, mahalliy hokimiyat suv ta’minoti bo‘yicha o‘chirish jadvallarini joriy qilgan. Dnepropetrovsk viloyatida Marganes shahri artilleriya o‘qqa tutilishi natijasida jabr ko‘rdi — to‘rt kishi yaralangan, yashash va ma’muriy binolar, korxonalar, do‘konlar va avtomobillar vayron bo‘lgan.

Ukraina Qurolli Kuchlarining havo kuchlari kechasi davomida Rossiyaning 147 ta dronidan 83 tasini urib tushirganini, yana 59 tasi maqsadga yetib bormaganini bildirdi. Hujum ostida qolgan hududlar: Xarkov, Kiyev, Poltava va Zaporojiye viloyatlari.