Rossiya Ukrainani jang maydonida yengishga qodir emas va boshqa yo‘llarni qidirmoqda

Rossiyaning Ukrainadagi hujumi qiyinchiliklarga duch kelayotgan bir paytda, Moskva Kiyevdagi siyosiy vaziyatni o‘zgartirishga umid bog‘lamoqda. Bu haqda The Moscow Times gazetasiga ikki amaldagi diplomat va Kremlga yaqin manba ma’lum qildi.

Nashr suhbatdoshlarining ta’kidlashicha, Kreml mojaroda Ukrainaning bosib olingan to‘rtta viloyati ustidan nazoratni o‘rnatish va Kiyevning siyosiy mustaqilligini zaiflashtirish kabi katta maqsadlarini saqlab qolmoqda. Biroq, Ukraina tomoni hududiy yon berishga tayyorligini bildirmagani uchun bu variantni ham amalga oshirish mushkul bo‘lib qolmoqda.

Yana bir ehtimoliy ssenariy - Vashington orqali Kiyevga bosimni kuchaytirish. Manbaning aytishicha, Kreml AQSh ma’muriyatining yondashuvini o‘zgartirishga umid qilmoqda. Bu esa Ukrainada saylovlar o‘tkazilishiga olib kelishi mumkin.

Moskvaning fikriga ko‘ra, Zelenskiy qayta saylanmasligi, hokimiyatning ehtimoliy o‘zgarishi esa Kiyevning siyosiy yo‘nalishini to‘g‘rilashga olib kelishi mumkin.

Juma kuni Vladimir Putin saylovlarni tashkil etish uchun BMT va AQSh himoyasi ostida Ukrainada vaqtinchalik tashqi boshqaruv zarurligini ta’kidladi. "Arxangelsk" atom suv osti kemasi bortida aytilgan bu bayonot Kiyev va G‘arbga yo‘naltirilgan signal sifatida qabul qilindi.

Rossiyalik diplomatlar Zelenskiy hokimiyatda qolsa, Moskva bilan muzokaralar hech qanday yon berishlarga olib kelmasligiga ishonch hosil qilishgan. "Hozirgi paytda har qanday kelishuv Amerika tomoniga qadam emas, balki Kiyevga siyosiy sovg‘a bo‘lib ko‘rinishi mumkin," - deya izoh berdi manbalardan biri.

Shu bilan birga, Moskva Vashington bilan aloqalarni saqlab qolish uchun choralar ko‘rmoqda. Xususan, urinishlardan biri AQSh tomoni faol yoritgan "g‘alla bitimi"ni qayta tiklash bo‘ldi. Biroq, rossiyalik diplomatning aytishicha, bu harakat sezilarli siyosiy natijalarga olib kelmadi.