Bu haqda Germaniyaning Xalqaro xavfsizlik muammolari instituti ilmiy xodimi Yanis Klyuge tomonidan olib borilgan tadqiqot xulosasida so‘z boradi. Olimga ko‘ra, 2026 yilning birinchi choragida Rossiyaning harbiy xarajatlari 5 trillion 908 milliard rublga (taxminan 65 milliard dollar) yetgan.
Bu ko‘rsatkich o‘tgan yilning shu davriga nisbatan 29,9 foizga, 2024-yilning birinchi choragiga nisbatan esa 68,7 foizga ko‘pdir. 2023-yil bilan solishtirganda harbiy xarajatlar 129 foizga oshgan, 2022-yil boshidagi ko‘rsatkichga nisbatan esa farq yanada kattaroq — 4,6 barobar.
Qayd etilishicha, Rossiya byudjetida harbiy xarajatlar ulushi rekord darajada o‘sib, ilk bor 46 foizga yetgan. Klyuge shundan kelib chiqib har ikkinchi rubl Ukrainaga qarshi urushni moliyalashtirish uchun sarflanayotganini, bu soatiga taxminan 30 million dollardan to‘g‘ri kelayotganini ta’kidlagan.
Harbiy xarajatlarning asosiy o‘sishi Rossiya byudjetining yopiq yoki maxfiy bandlari hisobiga to‘g‘ri kelgan. Chorak yakuniga ko‘ra, maxfiy xarajatlar hajmi 3,4 trillion rubldan (taxminan 38 milliard dollar) 4,9 trillion rublgacha (taxminan 54 milliard dollar) oshgan. Tahlilchining fikricha, 2026 yil yakuniga borib Rossiyaning harbiy xarajatlari mamlakat yalpi ichki mahsulotining 9–10 foizigacha chiqishi mumkin. Bu esa byudjet taqchilligini oshiradi.
Klyugening hisob-kitoblariga ko‘ra, Ukrainaga qarshi keng ko‘lamli urush boshlangan 2022 yildan beri rossiyaliklar harbiy harakatlarni moliyalashtirish uchun qariyb 54 trillion rubl (taxminan 746,6 milliard dollar) sarflagan.
Timmi ismli kit bioyoqilg‘iga aylanadi
AQShda ham to‘y qilayotganlar aqldan ozmoqda
So‘nggi 140 yildagi eng kuchli El-Nino hodisasi yaqinlashmoqda. Bu butun dunyodagi ob-havoga ta’sir qilishi mumkin
