Rossiya Konstitusiyasini yana yangilaydimi?

Rossiya hukumati yaqin kelajakda Konstitusiyaga yangi o‘zgartirishlar kiritishi mumkin. Bu haqda Davlat dumasi vise-spikeri Petr Tolstoy Sankt-Peterburg xalqaro yuridik forumida so‘zlagan nutqida aytib o‘tdi.

Tolstoyning so‘zlariga ko‘ra, Ukrainada keng ko‘lamli urush boshlanganidan beri "ko‘p narsa o‘zgardi" va mamlakat o‘zining Asosiy qonunini yangilashi kerak.

" Konstitusiyaga o‘zgartirishlar kiritilganiga besh yil bo‘ldi va aminmanki, amaldagi Konstitusiyamiz qanday sharoitlarda yozilganini hisobga olsak, bu o‘zgarishlar oxirgisi emas. Ishonchim komilki, bu o‘zgarishlar bizni hali oldinda. Va ular biz besh yil avval muhokama qilganimizdan ancha muhimroq bo‘lishi mumkin ", dedi u.

Tolstoy, shuningdek, so‘nggi o‘n yilliklarda Rossiya global huquqiy amaliyotni faol ravishda o‘zlashtirganini ta’kidladi, ammo ularning ko‘plari "g‘arbiy bo‘lib chiqdi va ildiz otmagan".

Rossiya Konstitusiyasiga so‘nggi yirik o‘zgartirishlar 2020 yilda kiritilgan . Keyin, umumxalq ovoz berish natijalariga ko‘ra, Prezident Vladimir Putinning prezidentlik muddati "nolga tenglashtirildi".

Bungacha 2008 yilda Konstitusiyaga o‘zgartirishlar kiritilgan: prezidentlik muddati to‘rt yildan olti yilgacha oshirilgan. O‘shanda tuzatishlar 2008 yildan 2012 yilgacha prezidentlik qilgan Dmitriy Medvedev tomonidan taklif qilingan edi.

2022-yilda Konstitusiyaga Ukrainaning Lugansk, Donesk, Zaporojya va Xerson viloyatlarini Rossiya tarkibiga kiritishni ta’minlovchi o‘zgartirishlar kiritildi. Bu o‘zgarishlar qo‘shib olingan hududlarni xalqaro tan olishga qaratilgan siyosatning bir qismi bo‘ldi.

Ilgari Rossiya hukumati vakillari bir necha bor Asosiy qonunda mustahkamlangan davlat mafkurasiga qo‘yilgan taqiqni qayta ko‘rib chiqishga chaqirishgan. Bunday tuzatish zarurligini adliya vaziri Konstantin Chuychenko va Tergov qo‘mitasi rahbari Aleksandr Bastrikin bildirgan. Ikkinchisi davlat mafkurasi masalasini "shunchaki chetga surib bo‘lmaydi", deb ta’kidladi.

Rossiyaning amaldagi Konstitusiyasi 1993 yil 12 dekabrda umumxalq ovoz berish yo‘li bilan qabul qilingan.