Rossiya elchixonasida “G‘alaba bizniki bo‘ladi” iborasi yozilgan banner osildi

Seuldagi Rossiya elchixonasida “G‘alaba bizniki bo‘ladi” iborasi yozilgan banner osildi, Janubiy Koreya uni olib tashlashni talab qildi.

Janubiy Koreya Tashqi ishlar vazirligining xabar berishicha, Seuldagi Rossiya elchixonasi binosiga 15 metrlik banner osilgan bo‘lib, unda Rossiya bayrog‘ining ranglarida “Pobeda budet za nami” (“G‘alaba bizniki bo‘ladi”) degan shior yozilgan.

Vazirlik bu banner Janubiy Koreya fuqarolari va boshqa davlatlar bilan munosabatlarda ortiqcha taranglik yaratishi mumkinligini, chunki u Rossiya-Ukraina urushiga ishora qilayotgandek qabul qilinishini bildirib, uni olib tashlashni talab qildi.

Rossiya elchixonasi esa bayonotida banner fevral oyida nishonlanadigan bayramlar – Diplomatik xodimlar kuni va Vatanni himoyachilari kuni munosabati bilan osilganini ma’lum qilgan.

Elchixona bayonotiga ko‘ra, bannerdagi ibora barcha rossiyaliklarga tanish bo‘lib, mamlakat tarixiga, jumladan, sovet xalqining fashistlar Germaniyasi ustidan g‘alaba qozonish uchun safarbar qilinishiga bog‘liq. Xabarda shuningdek, bayramlar tugagach, banner olib tashlanishi aytilgan.