Bu yil BRIKS guruhiga raislik qilayotgan Rossiya o‘z hamkorlarini shu oy oxirida bo‘lib o‘tadigan BRIKS sammiti oldidan G‘arb davlatlarining siyosiy bosimiga qarshi turish uchun Xalqaro Valyuta Jamg‘armasiga (XVJ) muqobil vosita yaratishga chaqirdi.
Dastlab Braziliya, Rossiya, Hindiston va Xitoyni o‘z ichiga olgan BRIKS kengayib, Janubiy Afrika, Misr, Efiopiya, Eron, Birlashgan Arab Amirliklari va Saudiya Arabistonini qamrab oldi.
BRIKSga a’zo davlatlar moliya va markaziy bankning yetakchi vakillari shu hafta Moskvada uchrashmoqda.
Yig‘ilishga mezbonlik qilayotgan Rossiya moliya vaziri Anton Siluanov, global moliyaviy tizim G‘arb davlatlari tomonidan nazorat qilinayotganini va jahon iqtisodiyotining 37 foizini tashkil etuvchi guruh muqobil yaratishi kerakligini aytdi.
«XVJ va Jahon banki o‘z vazifalarini bajarmayapti. Ular BRIKSga a’zo davlatlar manfaati yo‘lida ishlamayapti», dedi Siluanov uchrashuvning birinchi kunidagi tadbirda.
Rossiya 2022 yil fevralida Ukrainaga bostirib kirganidan so‘ng G‘arb tomonidan sanksiyalar tufayli Rossiya dollar va yevrodagi valyuta zaxiralari muzlatib qo‘yildi va moliya tizimiga jiddiy zarba berildi. Mamlakat xalqaro kapital bozorlaridan uzilib qolgan.
