Ronalduga Ginnesning rekordlar kitobi sertifikati topshirildi

23 mart kuni Ginnesning rekordlar kitobi vakili Portugaliya terma jamoasi hujumchisi Krishtianu Ronalduga sertifikat topshirdi.

Portugaliya futbol klubi matbuot xizmati xabariga ko‘ra, sertifikat Ronalduning terma jamoalar miqyosidagi o‘yinlardagi g‘alabalar soni bo‘yicha rekordi uchun mo‘ljallangan. Futbolchi bu rekordni 2024 yil 15 noyabrda Millatlar ligasi doirasida Polshaga qarshi o‘yinda o‘rnatgan edi.

40 yoshli Ronaldu Portugaliya terma jamoasi safida 132 ta g‘alabaga erishgan. Ronalduga bu ko‘rsatkichga erishish uchun 215 ta o‘yin kerak bo‘ldi.

Hujumchi ispanlardan quyidagi holatda oldinda:

Serxio Ramos (180 o‘yinda 131 g‘alaba);

Iker Kasilyas (167 o‘yinda 121 g‘alaba).

Millatlar ligasi 1/4 o‘yinida Ronaldu penaltidan foydalana olmadi, biroq Portugaliya terma jamoasi baribir yarim finalga yo‘l oldi.