Ronaldu: «Bu futbol, urush emas. Ko‘pchilik haddidan oshmoqda»

«An-Nasr» hujumchisi Krishtianu Ronaldu Saudiya Arabistoni chempionati atrofida yuzaga kelgan vaziyat va futbolchilarning doimiy e’tirozlari haqida o‘z fikrlarini ochiq-oydin bayon qildi.

«Al-Ahli» ustidan qozonilgan g‘alabadan (2:0) so‘ng portugaliyalik yulduz ligadagi muhitdan norozi ekanini yashirmadi.

«Hamma shikoyat qilyapti. Ko‘pchilik qilishi kerak bo‘lganidan ko‘prog‘ini qilmoqda. Bu — futbol, urush emas. Hamma g‘alaba uchun kurashishini bilamiz, ammo hamma narsaga ham ruxsat berilgan emas.

Mavsum yakunida men albatta gapiraman, chunki hozir juda ko‘p salbiy holatlarni ko‘ryapman. Ko‘plab futbolchilar hakamlar, liga va loyiha haqida tinimsiz shikoyatlar joylashtirishmoqda», — deydi Ronaldu.

41 yoshli futbolchining fikricha, bunday salbiy yondashuv liganing rivojlanish maqsadlariga zid keladi.

«Bu noto‘g‘ri deb o‘ylayman. Agar biz dunyoning eng yaxshi ligalaridan biriga aylanib, Yevropa bilan raqobatlashmoqchi bo‘lsak, namuna bo‘lishimiz kerak. Bunday harakatlarni to‘xtatishimiz, vaziyatni tahlil qilishimiz va liga rahbariyati bilan gaplashishimiz zarur. Chunki mening nazarimda, bu allaqachon futbol bo‘lmay qoldi», — deya qo‘shimcha qildi «An-Nasr» sardori.