Ramzan Qodirov Alla Pugachyovani “xalq dushmani” deb atadi

Checheniston rahbari Ramzan Qodirov Alla Pugachyovani chechen xalqi dushmani deb atadi. Bu gaplar xonanda tomonidan Johar Dudayev haqida aytilgan ijobiy fikrlardan keyin yangradi. Qodirov Pugachyovani chechenlarni “qarama-qarshi qilmaslikka” chaqirdi.

«Pugachyova kabi xalq dushmanlari va xiyonatkorlar chechen xalqi uchun eng og‘ir davr haqida ahmoqona mulohazalar bildirmasligi kerak», — dedi Qodirov o‘z bayonotida.

10 sentyabr kuni YouTube'da Alla Pugachyovaning uch soatlik intervyusi e’lon qilindi. Unda u birinchi chechen urushi haqida ham gapirdi:

«...Ayniqsa, birinchi chechen urushi xotiramda saqlanib qolgan, chunki men Johar Dudayevni bilardim. U juda yaxshi, tarbiyali, intelligent, go‘zal inson edi», — dedi Pugachyova.

Johar Dudayev — 1990-yillarda Chechen separatistlarining yetakchisi va o‘zini mustaqil deb e’lon qilgan Ichkeriya Respublikasining birinchi prezidenti bo‘lgan. U 1996 yil aprelda Rossiya harbiylari tomonidan o‘ldirilgan.

Pugachyova 2022 yilda Rossiya—Ukraina urushi boshlangach, mamlakatni tark etgan edi. Unga Katerina Gordeeva bilan suhbat — urush boshlanganidan beri birinchi katta intervyu bo‘ldi. YouTube’dagi videoni besh kun ichida 17 milliondan ortiq kishi ko‘rdi.