AQSh Mudofaa vazirligi Ukrainaning muhim ehtiyojlarini qondirish uchun 200 million dollarlik yangi harbiy yordam paketini e’lon qildi.
Paketda, jumladan, havo hujumidan mudofaa uskunalari, HIMARS artilleriya o‘q-dorilari, minomyot snaryadlari va tankga qarshi Javelin raketalari mavjud, deyiladi Pentagon bayonotida.
Bundan tashqari, paket o‘q otish qurollari, portlovchi moddalar, xavfsiz aloqa tizimlari, sun’iy yo‘ldosh tasvirini olish xizmatlari, shuningdek, yordamchi uskunalarga texnik xizmat ko‘rsatish uchun ehtiyot qismlarni taqdim etishni nazarda tutadi.
Qayd etilishicha, yangi paket AQSh prezidenti vakolatlari doirasida AQSh qurolli kuchlari omborlaridan to‘g‘ridan-to‘g‘ri qurol-yarog‘larni topshirishni nazarda tutadi.
Shu bilan birga, Pentagon AQSh ishlab chiqaruvchilariga qurol buyurtma qilishni nazarda tutuvchi Ukraina xavfsizligiga ko‘maklashish tashabbusi (USAI) mexanizmidan ham foydalanish niyatida.
Ushbu tashabbus doirasida Kiyevga havo hujumidan mudofaa uskunalari, uzoq masofali va tankga qarshi qurollar topshiriladi. Tasdiqlanishi kerak bo‘lgan ba’zi ma’lumotlarga ko‘ra, USAI paketining umumiy miqdori 1,5 milliard dollarni tashkil qiladi.
Pentagon bayonotida aytilishicha, Qo‘shma Shtatlar hamkorlari (50 ga yaqin davlat) bilan hamkorlikda Ukrainaga Rossiya agressiyasiga qarshi kurashish uchun zarur bo‘lgan muhim imkoniyatlarni taqdim etishda davom etadi.
