Qozog‘istonda 5-8 va 10-sinflarni tamomlagan o‘quvchilar qozoq tilidan imtihon topshiradi

Keyingi o‘quv yilidan boshlab 5-8 va 10-sinflarni tamomlagan o‘quvchilar qozoq tilidan imtihon topshirishlari mumkin. Bu haqda «Ashiq» portalida e’lon qilingan Xalq ta’limi vazirining buyrug‘ida aytilgan.

«2023-2024 o‘quv yilidan boshlab asosiy o‘rta ta’lim (5-8 sinflar), umumiy o‘rta (10 sinf) darajasida o‘quv yili tugagandan so‘ng qozoq tilini o‘rgatuvchi maktablarda «Qozoq tili» fani va qozoq tilidan boshqa tilda olib boriladigan maktablarda «Qozoq tili va adabiyoti» fanidan imtihon joriy etiladi. Qozoq tilidan imtihon davlat majburiy ta’lim standartiga muvofiq o‘quv rejasini o‘zlashtirish natijalariga ko‘ra yozma va og‘zaki shaklda o‘tkaziladi. Imtihon o‘tkazish vaqti ta’lim tashkilotining pedagogik kengashi tomonidan belgilanadi. Vazifalar o‘qituvchilar tomonidan tuziladi va akademik halollik tamoyillariga rioya qilgan holda ta’lim tashkiloti ma’muriyati tomonidan tasdiqlanadi. «Qozoq tili», «Qozoq tili va adabiyoti» fanlari bo‘yicha yakuniy baho imtihon (5 balli tizimda) va yillik baholash (5 balli tizimda) natijalariga ko‘ra 30-70 foiz nisbatida belgilanadi. Yakuniy baholash butun songa yaxlitlanadi», - deyiladi hujjatda.

Buyruqning izohida yozilganidek, qozoq tilining mavqeini oshirish maqsadida bunday o‘zgartirish amalga oshirilishi kerak.

«Davlat tili maqomini oshirish maqsadida 5-8, 10-sinflarda qozoq tilidan imtihon joriy etiladi», - deyiladi buyruqda.

Eslatib o‘tamiz, mazkur norma 2023 yil 1 sentyabrdan boshlab joriy etiladi.

Buyruq 3 fevralgacha jamoatchilik muhokamasi uchun ochiq bo‘ladi.