Qora dengiz Rossiyaning “soya floti”ga tegishli ikki tankeri portlab ketdi

Turkiya qirg‘oqlari yaqinida Rossiyaning “soya floti”ga tegishli ikki tankerning portlashi Ukraina Xavfsizlik xizmatining maxsus amaliyoti natijasidir, deb xabar bermoqda “RBK-Ukraina”.

Nashrning anonim manbasiga ko‘ra, Ukraina Xavfsizlik xizmati (SBU) Sea Baby dengiz dronlari yordamida Qora dengizda Kairos va Virat neft tankerlariga hujum qilgan.

Rossiya neftini tashiganlik uchun sanksiyalar ostida bo‘lgan bu ikki tanker Turkiya qirg‘oqlari yaqinida deyarli bir vaqtning o‘zida yuz bergan portlashlardan zarar ko‘rgan. Turkiya rasmiylari bu hodisaning ehtimoliy sababi sifatida “tashqi aralashuv”ni tilga olgan. Qayd etilishicha, Virat tankeriga ikki marta zarba berilgan.

Ma’lumotlarga ko‘ra, hujum paytida kemalar bo‘sh bo‘lgan, ular yuk ortish uchun Rossiyaning Novorossiysk portiga ketayotgandi. Endilikda ular deyarli butunlay ishdan chiqqan.