Qirg‘izistonda o‘g‘itlar eksportiga taqiq joriy etilishi mumkin

Qarorga mineral o‘g‘itlarning strategik zaxirasini yaratish va mamlakat oziq-ovqat xavfsizligini yuqori darajada saqlash zarurati sabab bo‘ldi.

Qirg‘iziston Respublikasi Suv xo‘jaligi, qishloq xo‘jaligi va qayta ishlash sanoati vazirligi mamlakatdan mineral o‘g‘itlarni YEOII bojxona hududidan tashqariga olib chiqishni vaqtinchalik taqiqlash to‘g‘risidagi Vazirlar Mahkamasi qarori loyihasini jamoatchilik muhokamasiga taqdim etdi.

Qirg‘izistonning mineral o‘g‘itlarga yillik ehtiyoji 286,7 ming tonnani tashkil qiladi. Mamlakatda mineral o‘g‘itlar ishlab chiqarishning o‘zi yo‘q, ularning yillik ta’minoti umumiy ehtiyojning 45-55% ni tashkil qiladi. Asosiy yetkazib beruvchi O‘zbekiston bo‘lib, undan yiliga 100 ming tonna, shundan 60 ming tonnasi bahor-yozgi ish mavsumiga, 40 ming tonnasi kuz-qish mavsumiga yetkazib beriladi. Ayni paytda, haqiqatda, mamlakatning janubiy viloyatlarida bahorgi dala ishlari boshlanar ekan, boshqa mamlakatlarga reeksport qilinishi natijasida o‘g‘it yetishmovchiligi yuzaga kelgan.

“Mahalliy qishloq xo‘jaligi ishlab chiqaruvchilari uchun mavjud o‘g‘itlarning yetishmasligi qishloq xo‘jaligi mahsulotlarining raqobatbardoshligining pasayishiga, oziq-ovqat xavfsizligining yomonlashishiga va import ta’minotiga qaramlikning kuchayishiga olib kelishi mumkin. Mineral o‘g‘itlar eksportini taqiqlashning joriy etilishi milliy manfaatlarni himoya qilish, mahalliy qishloq xo‘jaligini qo‘llab-quvvatlash va agrosanoat majmuasining barqaror rivojlanishini ta’minlashga qaratilgan strategik muhim qarordir”, – deya tushuntirdi vazirlik.