O‘zbekistonda diplomlari to‘g‘ridan-to‘g‘ri (maxsus sinovlarsiz) tan olinadigan xorijiy oliy ta’lim muassasalari ro‘yxatini tasdiqlandi. Bu haqda Ta’lim sifatini nazorat qilish Davlat inspeksiyasi xabar berdi.
Quacquarelli Symonds (QS) World University Rankings, Times Nigher Education, Academic Ranking of World Universities tashkilotlari tomonidan xalqaro OTM reytingida birinchi 1000 talik ta’lim muassasalarining 2022 yil uchun ro‘yxati e’lon qilindi.
Ro‘yxatdan, jumladan, Rossiyaning Moskva davlat xalqaro munosabatlar instituti (MGIMO), Bauman nomidagi Moskva davlat texnik universiteti, Moskva, Sankt-Peterburg, Novosibirsk, Kazan, Tomsk va boshqa shaharlari universitetlari o‘rin olgan.
Ta’kidlash joizki, ushbu ro‘yxatga kiritilgan, ya’ni xalqaro e’tirof etilgan tashkilotlarning (QS, THE, ARWU) reytingida birinchi 1000 talik ro‘yxatidan joy olgan xorijiy oliy ta’lim muassasalarida olingan diplomlar to‘g‘ridan-to‘g‘ri (maxsus sinovlarsiz) tan olinadi.
Bu Vazirlar Mahkamasining 2019 yil 24 iyundagi qarorida belgilangan. Tan olishni tasdiqlatish uchun talabgorlar bevosita Davlat xizmatlari markazlari yoki Yagona interaktiv davlat xizmatlari portalida ro‘yxatdan o‘tgan holda murojaat qilishi kerak.
To‘liq ro‘yxat bilan ushbu havola orqali (https://tdi.uz/uploads/top1000/Top-1000(2022).pdf) tanishing.
