Qashqadaryo viloyati Qarshi tumanida xashak sotish uchun mo‘ljallangan ayvon yonib ketdi. Bu haqda viloyat FVB axborot xizmati xabar berdi.
Unga ko‘ra, 23 iyun kuni soat 16:34 larda Qarshi tumani “Tinchlik” MFY Yangiobod ko‘chasida yong‘in sodir bo‘layotganligi to‘g‘risida xabar kelib tushgan. Voqea joyiga qutqaruv xizmatidan jami 3 ta yong‘in-qutqaruv bo‘linmasi va 1 ta suv tashishga mo‘ljallangan avtomobil (vodovoz) jalb etilgan. Kuch-vositalar yong‘inga soat 16:42 larda yetib borib, soat 17:10 larda to‘liq o‘chirgan.
Ma’lum bo‘lishicha, yong‘in oqibatida fuqaro X.O‘.ning yashash uyi oldida chorva mollariga xashak sotish uchun mo‘ljallangan ayvonining 50 metr kvadrat tom qismi va yonida turgan “GAZ-53” va ustiga ortilgan somon bog‘lamlari (press) yongan. Yong‘in oqibatida tan jarohat olganlar yo‘q. Hozirda yong‘in sababi va zarariga aniqlik kiritilmoqda.
