NATO bosh kotibi ham Shimoliy Koreya qo‘shinlari Rossiyaga yuborilganini elon qildi.
NATO Bosh kotibi Mark Ryutte dushanba kuni matbuot anjumanida Rossiyada Shimoliy Koreya qo‘shinlari borligini aytdi.
«Bugun men Shimoliy Koreya qo‘shinlari Rossiyaga yuborilganini, Shimoliy Koreya harbiy bo‘linmalari esa Kursk viloyatiga joylashtirilganini tasdiqlashim mumkin», — dedi Ryutte jurnalistlarga. Ukraina kuchlari avgust oyida yirik hujumni boshlagan va Rossiya janubidagi hududlarni egallab olgan edi.
Shimoliy Koreya qo‘shinlarining u yerga joylashtirilishi Pxenyanning mojarodagi ishtirokining «sezilarli kuchayganini» ifodalaydi va «Rossiya urushining xavfli kengayishini» ko‘rsatadi, deya qo‘shimcha qildi Ryutte.
«Rossiya va Shimoliy Koreya o‘rtasidagi chuqurlashib borayotgan harbiy hamkorlik Hind-Tinch okeani va Yevro-Atlantika xavfsizligiga tahdiddir», dedi Ryutte.
Ryutte, shuningdek, Rossiyaning jang maydonidagi yo‘qotishlariga ishora qilib, bu Rossiya prezidenti Vladimir Putinning «noilojsizligi kuchayib borayotgani» belgisi ekanligini aytdi.
«Putin urushida 600 000 dan ortiq rossiyalik askarlar halok bo‘ldi yoki yaralandi va u Ukrainaga bo‘lgan hujumini chet el yordamisiz ushlab tura olmayapti», dedi Ryutte.
Rossiya tashqi ishlar vaziri Sergey Lavrov, Moskva va Pxenyan oxirgi marta iyun oyida imzolagan xavfsizlik bo‘yicha qo‘shma bitimga e’tibor qaratib, Ryuttening so‘zlariga yelka qisib qo‘ydi.
Lavrov shimoliy koreyalik askarlarning Rossiyada ekanligini tasdiqlamadi.
