Putin yaralangan rus askarlarini qo‘ltiqtayoqda jangga qaytarmoqda

Kreml askarlari xandaqlarda yurish moslamalari yordamida zo‘rg‘a yurayotganini ko‘rsatuvchi tasvirlar tarqaldi.

Vladimir Putin yaralangan rus askarlarini qo‘ltiqtayoqda jangga qaytarishga majburlamoqda, chunki Kreml faqat o‘tgan oyning o‘zida 48 ming askarini yo‘qotdi.

Holdan toygan va jarohat olgan rus jangchilari loyga botgan okoplardan yurish moslamalari yordamida ehtiyotkorlik bilan o‘tayotganini aks ettiruvchi yangi tasvirlar paydo bo‘ldi.

YouTube'da tarqalgan bu tasvirlar mustaqil ravishda tekshirilmagan, ammo G‘arbdagi rasmiy manba Sun nashrida shunday dedi: "Biz rossiyaliklar yaradorlarni jangga qaytarayotganining belgilarini ham ko‘rmoqdamiz. Qo‘ltiqtayoqdagi askarlarni yana jang chizig‘iga qaytarilayotganini videolarda ko‘rgansiz."

Rasmiy shaxs, shuningdek, Ukrainaning yanvar oyida rossiyaliklarning 50 mingga yaqin halok bo‘lgani va yaralangani haqidagi ma’lumotlari "ishonchli" ekanligini qo‘shimcha qildi.

Mudofaa vazirligining so‘nggi ma’lumotlariga ko‘ra, 2022-yil fevralida prezident Putinning Ukrainaga noqonuniy bostirib kirishi boshlanganidan beri Rossiyada 875 mingdan ortiq askar halok bo‘lgan yoki yaralangan bo‘lishi mumkin.

Rossiyaning yo‘qotishlar ko‘rsatkichi 2025 yil fevral oyida ham kuniga o‘rtacha 1000 dan ortiq bo‘lishi kutilmoqda, bu Rossiya harbiy operasiyalari va hujumlarining yuqori sur’atini aks ettiradi.

Ukraina qo‘shinlari ham Rossiya bilan urushda katta yo‘qotishlarga uchradi, biroq Kiyev o‘tgan yilning avgust oyida hududga to‘satdan bostirib kirganidan keyin Rossiyaning Kursk viloyati ichida nazoratni saqlab qolishga erishdi.