Portugaliyalik agent Barboza: «Ronaldu allaqachon terma jamoa bilan xayrlashishi kerak edi»

Portugaliyalik agent Paulu Barboza Portugaliya terma jamoasining 41 yoshli hujumchisi Krishtianu Ronaldu bu yozda o‘tayotgan JCH–2026 musobaqasida qatnashadigan milliy jamoa bilan allaqachon xayrlashishi kerak edi, degan fikrni bildirdi.

«Terma jamoaning o‘z muammolari bor. Biz Amerikaga kech yo‘l oldik va bu bizning foydamizga emas. Yetarlicha moslashish imkoniyatiga ega bo‘lmaymiz. U yerda havo juda issiq ekanini bilasiz. Shuningdek, jamoada Roberto Martines Krishtianu Ronaldudan qanday foydalanishi masalasida ham muammo bor. Afsuski, u endi 90 daqiqa davomida o‘ynay olmaydi.

Ronalduning jahon chempionati bilan bog‘liq o‘z maqsadlari bor. U rekord ortidan quvmoqda, shaxsiy ambisiyalarga ega. Shuning uchun u maydonga tushishi kerakligini talab qiladi. Martines undan qanday foydalanishini ko‘ramiz. Menimcha, Ronalduni 90 daqiqa davomida o‘ynatish salbiy oqibatlarga olib kelishi mumkin.

Bu doimo buyuk futbolchilar bilan bog‘liq muammo bo‘lgan. Ular jamoada katta ta’sir kuchiga ega va o‘yin vaqti talab qiladi. Agar u o‘ynamasa, jamoa ichidagi muhit yomonlashishi mumkin. Buni hammamiz tushunamiz va shundan xavotirdamiz.

Menimcha, Ronaldu allaqachon Portugaliya terma jamoasi bilan xayrlashishi kerak edi. 41 yoshda ham terma jamoaga chaqirilishni talab qilish muammo tug‘diradi. Biz eng yaxshi modelni topmaguncha, qiyinchiliklar bo‘lishi mumkin. Ronaldu maydonda bo‘lganida, jamoa ko‘proq qiyinchilikka duch keladi. Buni hamma tushunadi, ammo hozircha shunday muammo mavjud.

Umid qilamizki, Martines undan oqilona foydalana oladi. Menimcha, Ronalduni ishlatish mumkin, ammo 90 daqiqa emas. Uni vazifani hal qilish kerak bo‘lgan paytda 30–40 daqiqaga maydonga tushirish mumkin. Bu masalani juda ko‘p muhokama qilyapmiz. Ehtimol, Martines uni baribir asosiy tarkibda maydonga tushirishga harakat qiladi», — dedi Barboza «Chempionat» muxbiri Yegor Kabak bilan suhbatda.