Pezeshkiyon islomiy davlatlar o‘rtasidagi chegaralarni olib tashlashga chaqirdi

Eron Prezidenti Mas’ud Pezeshkiyon iroqlik mavqedoshi Abdul Latif Rashid bilan uchrashuvda Yevropa Ittifoqidagi kabi islomiy davlatlar o‘rtasida ham chegaralarni olib tashlashga chaqirdi. Bu haqda “Tasnim” axborot agentligi xabar berdi.

Eron Prezidentining so‘zlariga ko‘ra, islomiy mamlakatlar birligini mustahkamlash G‘arb tomonidan kiritilgan barcha sanksiyalarni samarasiz qiladi. Shuningdek, u Eron va Iroq o‘rtasidagi ikki tomonlama hamkorlik sohasida siyosiy, iqtisodiy va madaniy aloqalarni kengaytirish uchun ixtisoslashgan komissiyalar tashkil etishni taklif qildi.