Pashinyan: "Ozarbayjon bilan tinchlik o‘rnatishdan bosh tortish Armaniston xavfsizligiga halokatli tahdiddir"

Armaniston Bosh vaziri Nikol Pashinyan Armaniston va Ozarbayjon o‘rtasida tinchlikka erishish yangi urush eshigini tubdan yopish demakdir, deb ta’kidladi.

Bu haqda Pashyanin o‘zining Facebook ijtimoiy tarmoqdagi sahifasida aytib o‘tdi.

Armaniston hukumati rahbarining so‘zlariga ko‘ra, hozirgi tinchlik kun tartibidan voz kechish aslida qarama-qarshilik mantig‘iga qaytishni anglatadi.

"Kocharyan, Karapetyan va Sarukyan boshchiligidagi kuchlar Armaniston va Ozarbayjon o‘rtasidagi tinchlik shartnomasini qayta ko‘rib chiqish tarafdori ekanligi aniq. Bugungi kunda aynan shu kuchlar keskinlashuv eshigini ochishga harakat qilmoqda va bu, shubhasiz, Armaniston Respublikasi xavfsizligiga halokatli tahdid soladi.

Eng optimistik ssenariyni ham hisobga olsak, tinchlik shartnomasini qayta ko‘rib chiqish muzokaralar jarayonida oxir-oqibat kelishilgan barcha tarkibni o‘zgartirish imkoniyatini yaratadi. Nazariy jihatdan, bu tarkib ham yaxshi, ham yomon tomonga o‘zgarishi mumkin. Biroq, butun tuzilma shunchaki qulashi ehtimoli ancha yuqori", deb ta’kidladi Pashinyan.