“Oltin to‘p” sovrini uchun asosiy da’vogarlar ro‘yxati ma’lum bo‘ldi

Futbol olamidagi eng nufuzli sovrinlardan biri — “Oltin to‘p” uchun kurash davom etmoqda. Goal nashri 2026-yilgi sovrin uchun da’vogarlarning yangilangan reytingini e’lon qildi.

Ro‘yxatning birinchi pog‘onasidan Angliya terma jamoasi hamda “Bavariya” hujumchisi Harri Keyn joy oldi. Ikkinchi o‘rinni “Bavariya”ning boshqa bir futbolchisi — Maykl Olise egallagan bo‘lsa, kuchli uchlikni “Real” forvardi Kilian Mbappe band etgan. “Barselona” vingeri Lamin Yamal esa to‘rtinchi o‘rinni egallab turibdi.

Reytingning kuchli o‘nligi bilan tanishing:

1. Harri Keyn (“Bavariya”) — 55 gol, 6 assist.
2. Maykl Olise (“Bavariya”) — 19 gol, 31 assist.
3. Kilian Mbappe (“Real Madrid”) — 46 gol, 9 assist.
4. Lamin Yamal (“Barselona”) — 24 gol, 20 assist.
5. Luis Dias (“Bavariya”) — 26 gol, 20 assist.
6. Erling Holand (“Manchester Siti”) — 46 gol, 9 assist.
7. Usmon Dembele (“PSJ”) — 16 gol, 9 assist (Amaldagi g‘olib).
8. Xulian Alvares (“Atletiko Madrid”) — 19 gol, 10 assist.
9. Vitinya (“PSJ”) — 7 gol, 10 assist.
10. Deklan Rays (“Arsenal”) — 6 gol, 13 assist.

Ma’lumot uchun, Argentina terma jamoasi hujumchisi Lionel Messi hamda portugaliyalik futbolchi Krishtianu Ronaldu hamon da’vogarlar qatoridan joy olgan. “Inter Mayami” sardori “Oltin to‘p” uchun kurashda 15-o‘rinni egallab turgan bo‘lsa, “An-Nassr” bilan Saudiya chempioni bo‘lishga yaqin turgan Ronaldu 17-pog‘onani band etgan.

Eslatib o‘tamiz, 2026-yilgi “Oltin to‘p” poygasida kim g‘olib chiqishi Jahon chempionatidan so‘ng aniq bo‘ladi. Mundialda bosh sovringa qaysi futbolchi ega chiqsa, uning “Oltin to‘p”ni qo‘lga kiritish imkoniyati yuqori baholanmoqda.