Olovli Kaliforniya: zarar taxminan 250-275 milliard dollarni tashkil etmoqda

AQShning Kaliforniya shtatida davom etayotgan o‘rmon yong‘inlari oqibatida yetkazilgan zarar taxminan 250-275 milliard dollarni tashkil etmoqda.

Bu haqda The Washington Post gazetasi AccuWeather ob-havo ma’lumotlari xizmatiga tayanib xabar berdi.

"Los-Anjeles atrofidagi hududlarda sodir bo‘layotgan yong‘inlar 12 mingdan ortiq binoni vayron qilgan. Kaliforniyadagi o‘rmon yong‘inlari oqibatida halok bo‘lganlar soni 25 nafarga yetgan. Rasmiylar qurbonlar soni haqida yakuniy ma’lumot berishga hali erta ekanligini aytishmoqda", deb yozadi nashr.

Hozirgi yong‘inlar AQShda sodir bo‘lgan so‘nggi ofatlardan, masalan, 2023 yildagi Gavayidagi o‘rmon yong‘inlari va 2024 yildagi Xelena to‘fonidan ko‘proq zarar keltirgan. 14 yanvar kuni ob-havo yomonlashishi kutilmoqda, bu esa yong‘in yanada kengroq tarqalishiga sabab bo‘lishi mumkin.