Narkoz ostida zo‘rlangan bolalar: jarroh 20 yilga qamaldi

Fransiya sudi yuzlab voyaga yetmagan bemorlarni jinsiy zo‘rlashda aybdor deb topilgan sobiq jarroh, 74 yoshli Joel Le Skuarnekni 20 yil ozodlikdan mahrum qilishga hukm etdi, deb xabar bermoqda France24.

Skuarnek allaqachon 2020 yilda chiqarilgan hukm bo‘yicha jazo muddatini o‘tamoqda: o‘shanda unga to‘rt nafar bolani, jumladan, ikki jiyanini zo‘rlagani uchun 15 yil qamoq jazosi berilgandi.

Shifokorning ikkinchi ishi materiallariga ko‘ra, u 299 nafar bemorga nisbatan zo‘rlash va boshqa jinsiy zo‘ravonlik harakatlarini sodir etgan, ularning 256 nafari 15 yoshdan kichik bolalar bo‘lgan. Skuarnek bu jinoyatlarni 1989 yildan 2014 yilgacha Fransiya shifoxonalarida ishlagan paytida sodir etgan. Ayblov bayonotiga ko‘ra, uning taxminiy qurbonlarining aksariyati narkoz ta’sirida bo‘lganligi sababli sodir bo‘lgan voqea haqida hech narsa eslay olmagan.

Polisiya ular bilan bog‘lanib, ularning ismlari - zo‘ravonlikning batafsil tasvirlari bilan birga - Le Skuarnekning kundaligida qayd etilganini xabar qilganda, ular dahshatga tushishdi. Ayblovga ko‘ra, Le Skuarnekning oila a’zolari uning bu qilmishlaridan xabardor bo‘lishgan, ammo unga to‘sqinlik qila olishmagan. "Aynan oiladagi omerta (bir-birini himoya qilish) tufayli uning zo‘ravonligi o‘n yillar davomida davom etgan," - deb BBC’ga ishda qatnashgan advokatlardan biri aytdi.

Skuarnek sodir etgan zo‘ravonliklarni tasvirlab, qurbonlarining ismlari va yoshini ko‘rsatib, kundalik yuritgan. Shifokor o‘zini buzg‘unchi va pedofil deb ta’riflab, bundan juda mamnun ekanligini yozgan.

France24 xabar berishicha, prokuror Skuarnekka nisbatan 20 yillik ozodlikdan mahrum qilish jazosini talab qilgan - bu unga qo‘yilgan ayblovlar bo‘yicha mumkin bo‘lgan eng uzoq muddat. Sobiq shifokor o‘z aybini to‘liq tan olgan.