Rossiyaning Moskva shahrida 36 yoshli o‘zbekistonlik erkak ajrashishga ariza bergani uchun 29 yoshli xotinini pichoqlab o‘ldirdi, deya xabar berdi teznews.uz
Ma’lum qilinishicha, 10 sentyabr kuni soat 05:30 atrofida 36 yoshli Ilhom Moskva shahridagi «Kashira plaza» savdo markazi yonida mazkur markazda farrosh bo‘lib ishlaydigan xotinini 7 marta pichoqlagan. Ushbu hodisa kameralarga yozilib qolgan. Videoda jinoyatchi marhumni yo‘lakka yiqitgani va pichoq bilan zarba bergani aks etgan.
Qayd etilishicha, ayol ko‘krak va yurak qismidan olgan jarohatlari oqibatida voqea joyida vafot etgan. Guvohlar mazkur voqeaga nisbatan hech qanday munosabat bildirmagan va o‘z ishi bilan mashg‘ul bo‘lgan.
Shuningdek, erkak xotinining ajrashishga ariza bermoqchi bo‘lgani uchun o‘ldirganini aytgan. Hozirda Rossiya Tergov qo‘mitasi tomonidan jinoyat ishi qo‘zg‘atilgan. Qo‘mita yaqin vaqt ichida sudga erkakni hibsga olish to‘g‘risida iltimosnoma yuborishi belgilangan.
