Mixail Drapatiy Ukraina Qurolli Kuchlarining yangi bosh qo‘mondoni. U haqida nimalar ma’lum?

​Kiyev va Lvovdagi ommaviy noroziliklar fonida Ukraina prezidenti Volodimir Zelenskiy Ukraina Qurolli Kuchlari bosh qo‘mondonini almashtirishga qaror qildi. Bu lavozimni general-mayor Mixail Drapatiy egallaydi. U Ukrainaning eng taniqli harbiy rahbarlaridan biri hisoblanadi, jangovar komandir obro‘siga ega va so‘nggi yillarda armiyada bir qator asosiy lavozimlarda ishlagan. Shu bilan birga, uning nomi bir necha bor ham muvaffaqiyatlar, ham bahsli holatlar markazida bo‘lgan.

U bo‘linma komandiridan tortib UQKning eng nufuzli generallar orasigacha bo‘lgan yo‘lni bosib o‘tgan. Drapatiy 2014 yilda Mariupolda harbiy zirhlangan mashinada rossiyaparast kuchlarning barrikadasini yorib o‘tishi bilan keng tanilgan. Donbassdagi janglarda qatnashgan.

Keng ko‘lamli urush boshlangach, "Janub" qo‘shinlar guruhiga qo‘mondonlik qilgan, Krivoy Rog mudofaasida va Xerson viloyati hududlarini ozod qilishda qatnashgan. 2024 yilda mintaqada Rossiya qo‘shinlarining hujumini qaytargan "Xarkov" qo‘shinlar guruhiga boshchilik qilgan. 2024 yil oxirida UQK Quruqlikdagi qo‘shinlari qo‘mondoni etib tayinlangan.

​2025 yilning iyun oyida poligondagi raketa zarbasidan so‘ng (unda 12 nafar yangi askar halok bo‘lgan va 60 dan ortig‘i yaralangan) iste’foga ariza bergan. "Bu mening ushbu fojia uchun shaxsiy mas’uliyat hissim bilan bog‘liq anglangan qadamimdir. Murosasozlik va jazosizlik — armiya uchun zahardir", — deb yozgan edi o‘shanda Drapatiy Facebook'dagi sahifasida.
​
Drapatiy — sobiq mudofaa vaziri Mixail Fedorov iste’foga chiqqanidan so‘ng uni oshkora qo‘llab-quvvatlagan yagona yuqori lavozimli ukrainalik general.

​Ukraina OAVlarida Drapatiy tez-tez harbiylar va jamiyat orasida eng mashxur generallardan biri sifatida tilga olinadi. Shu bilan birga, uning sobiq bosh qo‘mondon Aleksandr Sirskiy bilan kelishmovchiligi va armiya rahbariyatida ta’sir doirasi uchun bo‘lishi mumkin bo‘lgan kurashi haqida ham fikrlar mavjud.