Majburiy ijro byurosi Mirobod tuman bo‘limi hamda tuman prokuraturasi bilan hamkorlikda soliq to‘lovlaridan bo‘lgan yirik qarzdorlikka ega bo‘lgan sub’ektlarning mas’uliyatini kuchaytirishga qaratilgan tadbirlar amalga oshirilmoqda.
Jumladan, Byuroning Mirobod tumani bo‘limi ish yurituvida qarzdor korxonalardan davlat foydasiga soliq qarzdorliklarini undirish borasida bir qator ishlar amalga oshirildi.
Bo‘lim ish yurituviga qarzdor jamiyatdan davlat foydasiga 10 milliard 200 million so‘mdan ziyodroq soliq qarzdorligini undirish to‘g‘risidagi Soliq qo‘mitasi yirik soliq to‘lovchilar bo‘yicha hududlararo davlat soliq inspeksiyasining qarori kelib tushgan.
Shunga asosan Byuroning tuman bo‘limi tomonidan ijro ishi qo‘zg‘atilib, tomonlarga yuborilgan. Qarzdor tashkilot qonun talabi asosida berilgan ixtiyoriy muddatda soliq qarzdorligini qoplamagan.
Shu sababli, davlat ijrochisi tomonidan majburiy ijro harakatlariga kirishilib, qarzdor jamiyatdan 10,2 milliard so‘mdan ziyod soliq qarzdorligi to‘liq undirildi.