2024 yil 19 iyundan 22 iyungacha MESCA jamg‘armasi Daun sindromiga ega 200 dan ortiq bolalar uchun oftalmologik, eshitish va stomatologik skrining tekshiruvini o‘tkazadi. Tekshiruvlar Samarqand davlat tibbiyot universiteti (SDTU) ning Ko‘p tarmoqli klinikasi Jarrohlik markazida amalga oshiriladi.
MESCA jamg‘armasining asosiy maqsadi O‘zbekiston va Markaziy Osiyodagi aholining ijtimoiy zaif qatlamlarini yuqori sifatli tibbiy yordam bilan ta’minlashga qaratilgan. MESCA sog‘liqni saqlash xizmatlarini kengaytirmoqda – Samarqandda nafaqat oftalmologik skrining, balki eshitish bo‘yicha va stomatologik tekshiruvlar ham o‘tkaziladi. Bundan tashqari, SDTU shifokorlari, ordinator va talabalari uchun O‘zbekistondagi pediatriya jamiyati uchun sog‘liqni saqlash vazifalari bo‘yicha simpozium o‘tkaziladi. Shuningdek, keratokonus diagnostikasi va davolash bo‘yicha ochiq klinik trening bo‘lib o‘tadi. Daun sindromli bolalarning ota-onalari va o‘qituvchilari uchun mahorat darslari tashkil etiladi. Ushbu mahorat darslari profilaktika tibbiyoti bo‘yicha ta’limni qo‘llab-quvvatlash, ya’ni kasalliklar boshlanishidan oldin ularning oldini olish uchun yo‘naltirilgan.
Barcha tekshiruvlar Shveysariya, Toshkent va Samarqanddan kelgan mutaxassislar tomonidan o‘tkaziladi.
MESCA jamg‘armasi 2023 yildan boshlab O‘zbekistonda Daun sindromiga ega bolalar uchun skrining o‘tkazib kelmoqda. Keratokonusni aniqlash uchun oftalmologik skrining shular jumlasidandir (Keratokonus – oftalmologiya sohasidagi kasallik bo‘lib, yallig‘lanish xususiyatiga ega bo‘lmagan shox pardaning progressiv degenerativ jarayoni rivojlanishidir).
2023 yil avgust oyida Toshkentda tekshiruvlar natijasida 113 nafar bola ro‘yxatga olingan bo‘lib, ulardan 65 nafari skrining qilingan va 2 nafarida keratokonus aniqlangan. Keyinchalik, 2024 yil mart oyida Andijonda 174 nafar bola ro‘yxatga olindi, 94 nafari skrining tekshiruvidan o‘tdi. Ular orasida keratokonusli bemorlar aniqlanmadi. Shuni ta’kidlash kerakki, Daun sindromiga ega bolalarda keratokonus xavfi umumiy aholiga qaraganda ancha yuqori. Keratokonus bolalarda ko‘zi ojizlikning dunyodagi asosiy sababchisidir. Bundan tashqari, Daun sindromiga ega odamlarda noto‘g‘ri tashxis qo‘yish xavfi ortadi.
MESCA jamg‘armasi haqida
Jamg‘arma 2021 yilda tashkil etilgan bo‘lib, «Markaziy Osiyodagi tibbiy mahorat va fan» degan ma’noni anglatadi. Jamg‘arma asoschisi – o‘zbekistonlik tadbirkor va saxovatpesha inson Baxtiyor Fazilovdir. Jamg‘arma mamlakatdagi tibbiy mahoratni qo‘llab-quvvatlash va ta’limni rivojlantirishga ko‘maklashish, o‘quv kurslari va klinik tadqiqotlarni tashkil etishga qaratilgan. MESCA jamg‘armasi to‘rtta ustunga ega: ta’lim, tadqiqot, ma’rifiy faoliyat va texnologiyadan foydalanish. Shunday qilib, jamg‘arma O‘zbekiston va Markaziy Osiyoda, birinchi navbatda sog‘liqni saqlash sohasida aholi uchun hayot sifatini yaxshilaydigan loyihalarni qo‘llab-quvvatlaydi. Bugungi kunga kelib, Jamg‘arma butun dunyo bo‘ylab eng yaxshi amaliyotlar modellarini olib, ularni Markaziy Osiyo sharoitlariga tatbiq qilmoqda.
