Masharipov Krishtianu bilan munosabati haqida gapirdi

O‘zbekiston milliy jamoasi yarimhimoyachisi Jaloliddin Masharipov rossiyalik jurnalist Nobel Arustamyanga intervyu berib, «An-Nasr»dagi Krishtianu Ronaldu bilan munosabati haqida gapirdi.

«Men 7-raqamli libosni Ronalduga berishni istamaganim haqidagi gaplar yolg‘on. O‘shanda «An-Nasr» prezidenti meni chaqirib, ular Ronaldu bilan muzokara olib borayotgani va u kelishi mumkinligini aytishgandi. O‘shanda Krishtianu kelsa, unga 7-raqamli libosni topshirishim kerakligini darhol tushungandim. Rahbariyat ham bu to‘g‘ri qaror bo‘lishini aytishdi. Ularga hech shubhasiz 7-raqamni unga topshirishimni, u eng hurmatga loyiq buyuk o‘yinchi ekanini aytdim. Dunyoda faqat ikkita top-futbolchi bo‘lsa biri Ronaldu, biri Messi. O‘shanda ko‘p joyda o‘zim haqimda yozilgan turli noto‘g‘ri gaplarga ko‘zim tushdi, go‘yoki men 7-raqamni berishni istamagan ekanman, Ronaldu meni jamoadan chetlatmoqchi bo‘lgan ekan. Ammo bu gaplar yolg‘on edi.

Jamoadan ketganimdan keyin ham Ronalduga qarshi OCHL o‘yinida maydonga tushganimda ham, u yonimga kelib men bilan juda yaxshi munosabatda bo‘ldi, o‘zaro suhbatlashdik. U meni qattiq hurmat qiladi», - dedi Jaloliddin Masharipov.

Eslatib o‘tamiz, Masharipov 2021-23 yillar davomida Saudiya Arabistonining «An-Nasr» sharafini himoya qilgan edi.