Bugun.uz manbasiga ko‘ra, Markaziy bankning Buxoro viloyati boshqarmasi boshlig‘i Mansurov Erkin Muxtorovichga nisbatan qamoqqa olish tarzidagi ehtiyot chorasi qo‘llanilgan. Unga nisbatan o‘zlashtirish yoki rastrata yo‘li bilan talon-toroj qilish hamda mansab soxtakorligi moddalari bo‘yicha jinoyat ishi qo‘zg‘atilgan.
Manbaning ma’lum qilishicha, Erkin Mansurov Jinoiy guruhlar bilan til biriktirib, noqonuniy kredit ajratishga yordam bergan va juda katta miqdorda – 20 million dollardan ortiq pul mablag‘larini o‘zlashtirishda ishtirok etgan.
Erkin Mansurov 2012 yildan 2021 yilgacha «Ipoteka-bank» aksiyadorlik tijorat bankining Buxoro viloyati filiali boshqaruvchisi lavozimida ishlab kelgan. 2021 yilda Markaziy bank Buxoro viloyati bosh boshqarmasi boshlig‘i lavozimiga tayinlangan.
U 1979 yil Buxoro viloyatida tug‘ilgan. Mehnat faoliyatini «Paxtabank» (hozirgi Agrobank) Buxoro viloyati filialidan boshlagan. Keyinchalik Markaziy bank Buxoro viloyat bosh boshqarmasiga o‘tib, turli lavozimlarda faoliyat yuritgan.
