Fransiya prezidenti Emmanuel Makron hafta oxirida qayta o‘qqa tutilgan Zaporojye atom elektr stansiyasida xavfsizlikni ta’minlash zarurligi haqida gapirdi.
"Zaporojye atom elektr stansiyasiga qilingan yangi hujumlardan so‘ng, takror aytamanki, stansiya xavfsizligini ta’minlash uchun hamma narsa qilinishi kerak. Biz bugun prezident Zelenskiy bilan bu masalani muhokama qildik. AES xavfsizligi yuzasidan sa’y-harakatlarimizni davom ettiramiz", deb yozdi Makron Twitter sahifasida.
Ukraina prezidenti Vladimir Zelenskiy kechki murojaatida Makronga qo‘llab-quvvatlagani uchun minnatdorchilik bildirdi va yana Zaporojye atom elektr stansiyasini demilitarizasiya qilishga chaqirdi.
