Los-Anjelesdagi o‘rmon yong‘inlari besh kishini o‘ldirdi, zarar 50 milliard dollardan oshdi

Kaliforniyaning Los-Anjeles okrugida yuz bergan yong‘inlar oqibatida kamida besh kishi halok bo‘ldi.

Bu haqda mahalliy ABC telekanaliga okrug sherifi Robert Luna ma’lum qilgan.

Kaliforniya yong‘in xizmati ma’lumotlariga ko‘ra, yong‘inlarning umumiy maydoni 10 ming gektardan oshdi va o‘sishda davom etmoqda. Yong‘in 1000 dan ortiq binoni vayron qilgan. Los-Anjeles okrugidagi 930 000 dan ortiq mijozlar elektr ta’minotisiz qolgan.

AccuWeather konsalting kompaniyasi ma’lumotlariga ko‘ra, yong‘inlardan ko‘rilgan zarar va iqtisodiy yo‘qotishlar 52-57 milliard dollarni tashkil qiladi.

1500 ga yaqin o‘t o‘chiruvchi yong‘in bilan kurashmoqda. Mahalliy hokimiyat qo‘shni okruglardan o‘t o‘chiruvchilardan yordam so‘ragan, Vashington, Oregon va Nevada shtatlaridan favqulodda xizmatlar ham yordamga yuborilgan. Biroq uchala yong‘inning birortasi ham hozircha o‘chirilgani yo‘q. Yong‘inlar hududida kuchli shamollar bilan birga past namlik saqlanib qolmoqda.