Janubiy Koreyaning mashhur BTS guruhi “MTV European Music Awards 2020”ning to‘rt toifasida to‘rt sovrinni qo‘lga kiritdi.
Bu haqda mukofot matbuot xizmati xabar berdi.
Unga ko‘ra, guruh "Eng yaxshi qo‘shiq", "Eng yaxshi guruh", "Eng yaxshi onlayn konsert" hamda "Eng katta muxlislar bazasi" yo‘nalishlarida g‘oliblikni qo‘lga kiritgan.
Shuningdek, “Coldplay” musiqachilari “Eng yaxshi rok guruhi”, Ledi Gaga “Eng yaxshi xonanda”, Xeyli Uilyams esa “Eng yaxshi alternativ ijrochi” deb topilgan.
Ta’kidlanishicha, koronavirus pandemiyasi tufayli taqdirlash marosimi bir joyda o‘tkazilmagan va g‘oliblar sayyoramizning turli burchaklaridagi chiqishlarini videoga yozishga majbur bo‘lishgan. Ma’lumotlarga ko‘ra, taqdirlash marosimi tadbirlari 2021 yilda Vengriyada bo‘lib o‘tadi.
Har yili o‘z egalariga topshiriladigan mukofot 1994 yilda “MTV Europe” musiqiy telekanali tomonidan ta’sis etilgan. Uning g‘oliblari internet orqali ovoz berish yo‘li bilan aniqlanadi.
