"UzAuto Motors"ning Chevrolet Cobalt avtomobili Ukrainaning Kiyev viloyati huquq-tartibot idoralari xodimlarining tanloviga aylandi. Bu haqda kompaniya axborot xizmati xabar berdi.
Qayd etilishicha, Ukrainadagi Chevrolet ommaviy segmentining rasmiy distribyutori bo‘lgan “Ravon Motors Ukraine” milliy polisiya faoliyatida qulayliklar yaratish uchun Cobalt avtomobillarini yetkazib berdi.
Kompaniya Kiyev viloyati polisiya boshqarmasi tomonidan Cobalt sotib olishda avtomobillarning qulay narxi va sifat borasidagi ustunligi asosiy omillar bo‘lganini ta’kidladi.
"Ukraina Milliy polisiyasi o‘z xizmat faoliyatida ko‘pgina turli avtomobil ishlab chiqaruvchilarning transport vositalaridan foydalanadi. Chevrolet Cobalt tanlovi ushbu avtomobilning o‘z segmentida yuqori sifati va ishonchliligining yana bir tasdig‘idir", deyiladi xabarda.
Ma’lumot o‘rnida o‘tgan yilning noyabr oyida Qozog‘istonning ikki viloyatidagi polisiya xizmati UzAuto Motors tomonidan ishlab chiqarilgan Cobalt avtomobillarini sotib olgan.
