Keskinlikni yumshatish uchun chegaradagi tashviqot radiokarnaylari olib tashlanadi

Janubiy Koreya rasmiylari 4 avgust kuni mamlakat chegarasi bo‘ylab Shimoliy Koreyaga qarshi radioeshittirishlar uchun mo‘ljallangan karnaylarni olib tashlashni boshladi. Bu haqda Korea Times yozmoqda.

Qayd etilishicha, prezident Li Chje Myonning yangi hukumati Pxenyan bilan keskinlikni yumshatishga intilmoqda.

Iyun oyida lavozimga kirishganidan ko‘p o‘tmay, Li ma’muriyati Shimoliy Koreya rejimini tanqid qiluvchi targ‘ibot dasturlarini to‘xtatgandi, chunki u qo‘shnilar bilan to‘xtab qolgan muloqotni qayta tiklashga harakat qilmoqda.

Biroq Shimoliy Koreya yaqinda muzokaraga bo‘lgan takliflarni rad etib, Janubiy Koreya bilan gaplashishdan manfaatdor emasligini ma’lum qilgan. Kim Chen Inning singlisi Kim Yo Jong Janubiy Koreyaning tinchlik tashabbuslarini «jiddiy va yanglish hisob-kitob» deb baholagan.

«Agar Janubiy Koreya bir nechta sentimental gaplar bilan o‘z xatti-harakatlarining barcha oqibatlarini ortda qolgandek qabul qilinishini kutayotgan bo‘lsa, bundan kattaroq yanglishish bo‘lishi mumkin emas», — deya ta’kidladi u.

Janubiy Koreyaning dushanbadan boshlab radiokarnaylarni demontaj qilishi «Janub va Shimol o‘rtasidagi keskinlikni yumshatishga yordam beradigan amaliy choradir», — deyiladi Janubiy Koreya tarafi e’lon qilgan bayonotda.