JSST 2050 yilgacha 11,5 millionta kasallanish holatining oldi olish bo‘yicha tavsiya berdi

📉 Jahon sog‘liqni saqlash tashkiloti avvalgi hisoboti orqali keyingi o‘n yil davomida dunyo bo‘yicha kattalar o‘rtasida jismoniy faollik darajasi 5 foizga pasayganini ma’lum qilgandi.

📊 O‘z navbatida, agar bu tendensiya davom etsa, 2030 yilgacha kamharakatlik ko‘rsatkichi 35 foizgacha oshishi mumkinligi ham aytilgandi.

👩‍💻 JSSTning Yevropa mintaqaviy byurosi ushbu tahlillarga asoslanib, kecha jismoniy faollik targ‘ibotiga doir yangi qo‘llanmani e’lon qildi.

🏓 Undan o‘rin olgan ko‘rsatmalar sport mashg‘ulotlari orqali aholi salomatligini mustahkamlashni ko‘zda tutadi.

⚽️ Xususan, qo‘llanmada haftasiga 150 daqiqa o‘rtacha intensivlikdagi jismoniy faollik bilan shug‘ullanish tavsiya qilingan. Yoki 75 daqiqalik kuchli jismoniy faollik ham buning o‘rnini bosa oladi.

🩺 Aks holda, kamharakatlik infarkt, insult, 2-tur qandli diabet, demans, ko‘krak va yo‘g‘on ichak saratoni kabi kasalliklarning rivojlanish xavfini oshiradi.

❓ Xo‘sh, byuro tavsiyalariga amal qilish orqali qanday natijalarga erishish mumkin?

📋 Yangi qo‘llanmada bu savolning javobi ham aks etgan.

🔎 Qayd etilishicha, agar Yevropa va Markaziy Osiyo mamlakatlari aholisi haftasiga 150 daqiqalik jismoniy faollikka erishsa, 2050 yilgacha 11,5 millionta kasallanish holatining oldini olsa bo‘ladi.

📌 Jumladan, 3,8 million kishi yurak-qon tomir xastaliklariga, 400 ming nafar odam saratonga chalinish xavfidan himoyalanadi.

💶 Qolaversa, bu orqali mintaqa bo‘yicha yiliga bemorlar salomatligini tiklashga sarflanadigan 8 milliard yevro miqdoridagi xarajatlarni tejashga erishiladi.