Jahon aksiya bozori quladi

Jahon aksiyalar bozori dinamikasini aks ettiruvchi MSCI (Morgan Stanley Capital International World Index) global indeksi ketma-ket ikkinchi kun pasayishni davom ettirmoqda. Bunga AQSh prezidenti Donald Trampning yangi bojxona to‘lovlarini joriy etish haqidagi bayonoti tufayli vujudga kelgan savdo ziddiyatining keskinlashuvi sabab bo‘lmoqda.

3 aprel, payshanba kuni MSCI 5,52 foiz pasayib, 544,18 punktgacha tushdi. 4 apreldagi dastlabki savdolarda esa pasayish davom etib, yana 1,32 foizni tashkil etdi.

Kechagi kunda AQSH, Yevropa va Osiyo birjalaridagi savdolar yakuniga ko‘ra, butun dunyo bo‘ylab kompaniyalarning umumiy qiymati 3,1 trillion dollarga kamaydi.

Bloomberg ma’lumotlariga ko‘ra, Amerika aksiyalari 2,5 trillion dollarga arzonlashdi. Stoxx 600 Yevropa indeksi 2 foizga tushdi va mutaxassislarning fikricha, bu uning so‘nggi uch yildagi eng yomon haftasi bo‘lishi mumkin. Agentlik tomonidan so‘rovga tortilgan ekspertlar o‘zaro savdo to‘siqlari tufayli bozorlardagi beqarorlik kuchayishini bashorat qilmoqda.