O‘zbekiston milliy terma jamoasi Jahon chempionatiga tayyorgarlikni davom ettirmoqda. Jamoa tibbiy shtabida faoliyat yuritayotgan italiyalik mutaxassislar Enriko Kastellachchi va Aldo Espozito futbolchilarning holati hamda tiklanish jarayoni haqida fikr bildirdi.
Enriko Kastellachchining ta’kidlashicha, terma jamoa futbolchilari hozirda yaxshi holatda bo‘lib, yuqori sur’atda mashg‘ulot o‘tkazmoqda.
"O‘zbekiston milliy terma jamoasining bir qismi bo‘lish men uchun katta sharaf. Futbolchilarning umumiy holati a’lo darajada. Umid qilamizki, Jahon chempionatigacha jiddiy jarohatlarsiz yetib boramiz. Behruz Karimov va Jaloliddin Masharipovning tiklanish jarayoni ham muvaffaqiyatli o‘tdi. Ularning jarohatlari og‘ir edi, ammo ular bu bosqichni katta matonat bilan yengib o‘tishdi", — dedi mutaxassis.
Shuningdek, u mahalliy tibbiy shtab bilan samarali hamkorlik yo‘lga qo‘yilganini ta’kidladi.
Aldo Espozito esa Jahon chempionati kabi nufuzli musobaqa oldidan futbolchilarning sog‘lig‘ini doimiy nazorat qilish muhimligini qayd etdi.
"Italiyada "Birlik — kuch" degan maqol bor. Biz mahalliy tibbiy shtab bilan bir-birimizni to‘ldirib ishlayapmiz. Futbolchilarning jismoniy holati, ovqatlanishi va uyqu rejimi doimiy nazoratda bo‘lishi kerak. Jahon chempionatida o‘yinlar yuqori sur’atda kechadi, shuning uchun ehtimoliy jarohatlarning oldini olish muhim ahamiyatga ega", — dedi Espozito.
Kannavaro Husanovdan boshqacha o‘ynashni talab qildi!
Kanada - O‘zbekiston o‘yini soat nechada boshlanishi va qaysi kanal orqali translyasiya qilinishi ma’lum bo‘ldi
Fabio Kannavaro O‘zbekiston terma jamoasidagi eng katta yo‘qotish qaysi futbolchi ekanini aytdi
