Istanbulning Shahzoda orollari haqida qiziqarli faktlar

Istanbulning yashirin javohirlaridan biri bo‘lgan Shahzoda orollari oktyabr oyida o‘zgacha tusga kiradi. Jonli metropol bo‘ylab oltin kuz o‘z tarovatini ko‘rsata boshlaganida, issiq va quyoshli ob-havo Osiyo tomonidagi sokin arxipelagni kashf qilish uchun ajoyib vaqtga aylanadi. Istanbul orollari tabiiy go‘zallik va madaniy merosning mukammal uyg‘unligi bilan ko‘zni qamashtiradi.

Istanbulda

Shahzoda orollari o‘z nomini Sharqiy Rim davridan oladi, bu yerda knyazlar kabi sulola a’zolari ham surgun qilingan. Bugungi kunda orollar guruhi o‘zining yam-yashil landshaftlari va me’moriy mo‘’jizalari, shaharning ko‘p madaniyatli jamiyati haqida tasavvur uyg‘otuvchi o‘xshashi yo‘q qasrlari va hayratlanarli cherkovlari bilan mukammal manzildir. Bundan tashqari, faqat piyodalar uchun mo‘ljallangan ko‘chalarda shahar elektr transport vositalari mahalliy aholi va sayyohlar uchun shaharning jozibadorligini oshiradi. Arxipelag to‘qqizta go‘zal oroldan iborat bo‘lib, ular orasida Buyukada, Heybeliada, Burgazada va Kinaliada eng ko‘p tashrif buyuruvchilari bilan ajralib turadi. Bosforning ajoyib manzaralaridan bahramand bo‘lgan holda shaharning har ikki tomonidan qulay parom safari orqali orollarga sayohat qilish mumkin. Marmara dengizining o‘rtasida joylashgan bu yashirin “jannat” manzillarni o‘rganish juda oddiy: maftunkor ko‘chalarda sayr qilish yoki biror velosipedni ijaraga olish. Betakror uylar, me’moriy mo‘’jizalar, ajoyib yashillik va dengiz manzaralaridan shunchaki bahra olish kifoya. Qirg‘oqdagi restoranlarda yangi mavsumiy baliq va gazak kabi turk oshxonasining mahalliy lazzatlarini tatib ko‘rish o‘zgacha zavq bag‘ishlaydi.

Buyukada: Arxipelagning eng katta oroli

Turkchada “katta orol” degan ma’noni anglatuvchi Buyukada Shahzoda orollarining eng kattasidir. Istanbulga juda yaqin bo‘lsa-da, Buyukada atmosfera nuqtai nazaridan butunlay boshqa bir dunyodek tuyuladi. Paromdan tushish bilan orolning mashhur Soat minorasi kutib oladi. Eng unutilmas quyosh botishiga guvoh bo‘lish uchun Buyukadaning eng baland tepaligi bo‘lgan Yujetepedagi Aya Yorgi cherkoviga tashrif buyurish kerak, bu esa tik tepalikka chiqishni talab qiladi. Orolning boshqa diqqatga sazovor joylari orasida Shahzodalar oroli muzeyi, turkiyalik yozuvchi Reshat Nuri Guntekinning qarorgohi va orolning olov minorasi vazifasini bajaradigan Adakule bor. Bundan tashqari, yaqinda amalga oshirilgan restavrasiyalardan so‘ng, ko‘plab tarixiy binolar Buyukadada turli xil qiziqarli tadbirlarga mezbonlik qiladigan madaniy va san’at maskani sifatida xizmat qila boshladi.

Heybeliada: Eng yashil orol

Istanbulning ikkinchi eng katta va yashil oroli Heybeliada o‘z nomini egar sumkasiga o‘xshash ko‘rinishidan olgan. Orol Istanbulda tinchlik va hamjihatlikda yashayotgan turli jamiyatning eng yaxshi namunalaridan biridir. Aya Yorgi Rokki monastiri, Bet Yaakov ibodatxonasi va Aya Nikola cherkovi orolda albatta ko‘rish kerak bo‘lgan imoratlardan. Heybeliada uzoq vaqtdan beri Istanbulliklar uchun “qochish” joyi bo‘lgan. U bahaybat daraxtlar soyasida o‘tirish, tarixiy choyxonalarda do‘stlar bilan diydorlashish, ko‘p asrlik reseptlarda tayyorlangan noyob baliq taomlarini tatib ko‘rish va muzqaymoqlardan zavqlanib, muhtasham uylarni ko‘rish kabi bebaho imkoniyatlarni taqdim qiladi.

Burgazada: Arxipelagning eng sokin vohasi

Shahzoda orollarining uchinchi yirik oroli Burgazada, ehtimol arxipelagdagi eng tinch oroldir. Orol o‘zining noyob qasrlari, monastirlari va tabiiy jozibasi bilan tashrif buyuruvchilarni lol qoldirmoqda. Boshqa orollardan farqli o‘laroq, Burgazada faqat bitta tepalikka ega. Bayrak tepaligi va bu tepalikdagi Xristos monastiri xarobalari oroldagi birinchi bekat bo‘lishi kerak. Keyin turk adabiyotining yirik namoyondalaridan biri bo‘lgan Sait Faik Abasiyanikning muzeyga aylantirilgan uyini ziyorat qilish mumkin. Oroldagi boshqa muhim binolar orasida Aya Yani cherkovi va Aya Yorgi Garibi monastiri mavjud.

Kinaliada: Eng yaqin va Qizil orol

Istanbulga eng yaqin orol Kinaliada bo‘lib, oson va sokin dam olish uchun ideal joy. Orol turkchada “xina” degan ma’noni anglatuvchi qizil tuprog‘ nomidan olingan. Orolni kashf qilish uchun Surp Krikor Lusavorik cherkovini ziyorat qilish kerak, chunki eng uzoq nuqtadan ham bu atigi yarim soat davom etadi. Ammo orolning jozibasini g‘aroyib kitob do‘konlari, shinam kafelar va quyosh botishini kuzatish hamda sayr qilish uchun juda mos keladigan takrorlanmas qirg‘oqlarda ko‘rish mumkin. Noyob orol shirinliklari uchun mahalliy qandolatxonaga tashrif buyurish yoki qo‘lda yasalgan suvenirlar sotiladigan kichik hunarmandlar do‘konlarini sayr qilish imkoniyatini boy bermang!