Isroil sun’iy intellektga ta’sir o‘tkazish uchun soxta tahlil markazini tashkil etgan

Isroil materiallari sun’iy intellekt chat-botlarining javoblariga ta’sir o‘tkazishda qo‘llanishi mumkin bo‘lgan soxta tahlil markazini tashkil etgan. Bu haqda Responsible Statecraft xabar berdi.

Gap o‘zini Amerika tadqiqot markazi sifatida taqdim etadigan va Isroil hamda Falastin haqida materiallar e’lon qiladigan Hanover Institute for Public Policy haqida bormoqda. Biroq nashr aniqlashicha, u mustaqil tahliliy tashkilot emas.

Loyiha saytida qayd etilishicha, u Isroil hukumatining davlat reklama agentligi buyurtmasi asosida Piro Inc. kompaniyasi tomonidan tashkil etilgan. Piro kompaniyasi asoschilaridan biri Spayk Lining «Ne poyman — ne vor» filmi prodyuseri Deniyel Rozenberg hisoblanadi.

6 avgustdan beri Hanover Institute Isroil-Falastin mojarosiga bag‘ishlangan 100 dan ortiq material e’lon qildi. Ular orasida 1948 yilda falastinliklarning ko‘chirilishi sabablari va G‘azo sektoridagi hozirgi vaziyat haqidagi maqolalar ham bor.

Responsible Statecraft ushbu materiallarning rasmiylashtirilishiga e’tibor qaratmoqda: ularda havolalar, statistika, mundarija mavjud bo‘lib, materiallar neytral uslubda yozilgan. Bunday tuzilish katta til modellarining ushbu materiallarni ishonchli manbalar sifatida qabul qilish ehtimolini oshirishi mumkin.

Piro kompaniyasining o‘zi mijozlarga AI Story Optimization — «sun’iy intellekt uchun hikoyalarni optimallashtirish» deb nomlangan xizmatni taklif qiladi. Kompaniya katta til modellari axborotning ishonchliligini qanday baholashini hisobga olgan holda kontent yaratishini ta’kidlaydi.

NewsGuard tahlilchisi Elis Lining fikricha, bunday saytlar qidiruv tizimlari va chat-botlar orqali Amerika auditoriyasiga axborot tarqatishga mo‘ljallangan bo‘lishi mumkin. Uning so‘zlariga ko‘ra, Hanover Institute neytral nom va sayt tuzilishidan tortib, Amerika bayrog‘i ranglaridagi dizayngacha odatiy Amerika tahlil markazi ko‘rinishini taqlid qiladi.

Institutning o‘zi akademik va taqrizdan o‘tgan tadqiqotlarga tayanishini bildirmoqda. Biroq Responsible Statecraft ma’lumotlariga ko‘ra, uning materiallarida muntazam ravishda Isroil hukumati, jumladan, armiya va Tashqi ishlar vazirligi materiallaridan foydalaniladi.

Nashr, shuningdek, Piro kompaniyasi o‘z faoliyati uchun Isroil hukumatidan 900 ming dollar olganini xabar qildi. Shartnoma Fransiyaning Havas Media reklama-kommunikasiya guruhi orqali amalga oshirilmoqda.