Isroil sobiq vaziri: Mamlakat "qorong‘u diktatura"ga aylanmoqda

Isroil sobiq mudofaa va tashqi ishlar vaziri, muxolifatdagi “Israyel Beytenu” partiyasining amaldagi rahbari Avigdor Libermanning aytishicha, agar hukumat Shin Bet rahbari Ronen Barni ishdan bo‘shatishga to‘sqinlik qiluvchi Oliy sudning potensial qarorini e’tiborsiz qoldirsa, siyosatchi prezident Isaak Gersogdan aralashuvni so‘raydi. The Jerusalem Post gazetasi Libermanning bayonotini “Netanyaxuni hokimiyatdan chetlatish” tahdidi sifatida izohladi.

Liberman o‘z nutqida “Isroil davlatining demokratik davlatdan qorong‘u diktaturaga aylanishi”ning oldini olishga chaqirib, “Shin Bet” razvedka agentligi rahbarining potensial ishdan olinishi “demokratiyani diktaturadan ajratib turuvchi qizil chiziq” bo‘lishini ta’kidladi.

“Agar hukumat Oliy sud qarorini hurmat qilmaslikka qaror qilsa, men Asosiy qonunda ko‘zda tutilgan vakolatlaridan kelib chiqib, davlat prezidentiga murojaat qilaman”, — dedi u. "Davlat Prezidenti mamlakatdagi barcha davlat idoralari va organlariga murojaat qilib, ular Oliy sud qarorini bajarishga majbur ekanligini tushunishi kerak, boshqa ko‘rsatmalar emas."

Liberman prezident Gersogdan Netanyaxuni lavozimidan chetlashtirishni so‘rashni rejalashtiryaptimi, degan savolga siyosatchi to‘g‘ridan-to‘g‘ri javob bermadi va “Isroil davlati diktaturaga aylanganda, prezidentning roli demokratiyani himoya qilishdan iborat”, dedi.