iPhone endi boylar uchunmi? Uning narxi rekord darajada ko‘tarilishi kutilmoqda

Amerika Qo‘shma Shtatlarining Apple kompaniyasi tomonidan ishlab chiqarilgan iPhone smartfonlari narxi AQSh prezidenti Donald Tramp ma’muriyati joriy qilgan yangi bojxona to‘lovlari tufayli 43 foizgacha oshishi mumkin. Bu ma’lumot Rosenblatt Securities investisiya banki tahlilchilarining baholashlariga asoslanib, Reuters agentligi tomonidan e’lon qilindi.

Tahlilchilarning hisob-kitoblariga ko‘ra, ilgari 799 dollar turgan iPhone 16'ning asosiy modeli narxi 1142 dollargacha ko‘tarilishi, iPhone 16 Pro Max’ning eng yuqori versiyasi narxi esa 1599 dollardan 2300 dollargacha o‘sishi mumkin. Mutaxassislar fikricha, agar ishlab chiqarishi asosan Xitoyda joylashgan Apple qo‘shimcha xarajatlarni xaridorlarga yuklasa, bunday narx o‘sishi yuz berishi ehtimoli bor.

Nashr eslatib o‘tishicha, Tramp o‘zining birinchi prezidentlik muddati davomida Amerika kompaniyalarini ishlab chiqarishni AQSh yoki qo‘shni mamlakatlarga ko‘chirishga undash maqsadida Xitoydan keltirilayotgan ko‘plab mahsulotlarga bojlar joriy etgan edi. O‘shanda Apple ma’lum imtiyozlarga erishishga muvaffaq bo‘lgan, ammo bu safar hech qanday istisnolar haqida xabar berilmagan.

Tramp 2 aprel kuni 185 mamlakat va hududdan keltirilayotgan mahsulotlarga bojxona to‘lovlari joriy etilishini e’lon qildi. U import tovarlarga eng kam boj stavkasini 10 foiz miqdorida o‘rnatishini bildirdi. Ayrim davlatlar uchun esa alohida tariflar belgiladi. Bojlar joriy etilganidan so‘ng, Amerika bozori kuchli tushkunlikni boshdan kechirdi.