Go‘sht iste’moli ayrim kishilarda xotirani yaxshilashi mumkin

Go‘sht iste’moli ayrim insonlarda xotirani yaxshilashi mumkin. Olimlar APOE genining o‘ziga xos variantiga ega bo‘lgan keksa odamlarda go‘shtni ko‘proq iste’mol qilish xotira pasayishining sekinlashishi va demensiya xavfining pasayishi bilan bog‘liq bo‘lishi mumkinligini aniqladilar.

Ushbu genotiplar, ε3/ε4 va ε4/ε4, Alsgeymer kasalligi xavfining ortishi bilan bog‘liq deb hisoblanadi. Tadqiqot natijalari JAMA Network Open jurnalida chop etildi.

Tadqiqotga dastlab demensiyasiz 60 yoshdan oshgan 2157 kishi kiritilgan. 15 yil ichida ularning 296 tasida kasallik rivojlangan. Tadqiqotchilar APOE ε3/ε4 va ε4/ε4 variantlariga ega bo‘lgan shaxslar guruhini alohida tahlil qilishdi - bu barcha ishtirokchilarning taxminan to‘rtdan bir qismi. Bu shaxslar orasida go‘shtni ko‘proq iste’mol qilish kognitiv salomatlikning yaxshi natijalari bilan bog‘liq edi.

Ushbu genetik variantlarning tashuvchilarida go‘shtni ko‘p iste’mol qilish, go‘shtni kam iste’mol qilish bilan solishtirganda, kognitiv pasayishning sekinlashishi va demensiya xavfining taxminan 55 foizga pasayishi bilan bog‘liq edi. Boshqa gen variantlari bo‘lgan ishtirokchilarda bunday bog‘liqlik topilmadi.

Biroq, rasionda qayta ishlangan go‘shtning yuqori ulushi yomonroq prognoz bilan bog‘liq edi. Mualliflar tadqiqot kuzatuv asosida o‘tkazilganini va shuning uchun to‘g‘ridan-to‘g‘ri sabab-oqibat bog‘liqligini isbotlamasligini ta’kidlaydilar. Biroq, natijalar shuni ko‘rsatadiki, parhezning miya salomatligiga ta’siri insonning genetik tuzilishiga bog‘liq bo‘lishi mumkin va universal parhez tavsiyalari hamma uchun ham mos kelmasligi mumkin.