Gruziya parlamenti xorijiy agentlarni ro‘yxatdan o‘tkazish to‘g‘risidagi qonunni qabul qildi

Gruziya parlamenti yakuniy o‘qishda xorijiy agentlarni ro‘yxatdan o‘tkazish to‘g‘risidagi qonunni qabul qildi. Bu haqda Tabula nashri xabar berdi.

"Gruziya parlamenti yalpi majlisda xorijiy agentlarni ro‘yxatdan o‘tkazish to‘g‘risidagi qonun loyihasini uchinchi va yakuniy o‘qishda ma’qulladi. Ushbu qonun AQShning Foreign Agents Registration Act (FARA) qonuniga o‘xshash", deb xabar bermoqda nashr.

Hujjatda “xorijiy prinsipal agent” tushunchasi belgilangan bo‘lib, bunday maqomga ega bo‘lganlar ro‘xatdan o‘tishi majburiy hisoblanadi. Tabula'ning xabar berishicha, Gruziyada talab faqat yuridik shaxslarga tatbiq etiladi. Ro‘yxatdan o‘tishdan bosh tortish jinoiy javobgarlikka sabab bo‘ladi. Qonun ijrosini Korrupsiyaga qarshi kurashish byurosi nazorat qiladi.

Qonun loyihasi mart oyi boshida parlament tomonidan birinchi o‘qishda ma’qullangan edi. Tushuntirish xatida qayd etilishicha, 2024 yil may oyida qabul qilingan “Xorijiy ta’sir to‘g‘risidagi” boshqa qonun (Rossiya qonuniga o‘xshash) shaffoflikni maqsadlarini yetarli darajada ta’minlamaydi, xususan, chet eldan moliyalashtiriladigan aksariyat notijorat tashkilotlari ro‘yxatdan o‘tmaslikni va sanksiyalarga duchor bo‘lishni afzal ko‘radi. Shunga ko‘ra, amaldagi qonun "qonun chiqaruvchining irodasini samarali amalga oshira olmaydi", deyiladi tushuntirish xatida.