Germaniya 16 yoshdan kichiklar uchun ijtimoiy tarmoqlarni taqiqlashni taklif qilmoqda

Germaniya shimolidagi Shlezvig-Golshteyn shtati bosh vaziri Daniel Gyunter 16 yoshgacha bo‘lganlar uchun ijtimoiy tarmoqlar, jumladan, Facebook, Instagram va TikTokdan foydalanishni taqiqlashga chaqirdi.

U bu haqda Bild am Sonntag gazetasiga bergan intervyusida aytib o‘tdi.

“Agar ijtimoiy tarmoqlar to‘g‘ri nazorat qilinmasa, u bolalarni zo‘ravonlikni ulug‘laydigan, jinsiy zo‘ravonlikni ko‘rsatadigan va soxta xabarlar tarqatuvchi narsalarga duchor qiladi”, — dedi Gyunter.

Uning so‘zlariga ko‘ra, rasmiylar "o‘zlarining himoya rolini e’tiborsiz qoldirganlar".

"Hozir paradigma o‘zgarishini boshlash va 16 yoshgacha bo‘lgan bolalar jamiyatimizda haqiqatan ham TikTok-dan xoli, umuman ijtimoiy tarmoqlardan xoli bo‘lib ulg‘ayishlari uchun hamma narsani qilish vaqti keldi", dedi u.

Gyunter qaysi platformalarni taqiqlashni zarur deb bilishi haqidagi savolga u Facebook, Instagram va TikTok nomini aytdi. "Ular juda keng tarqalgan va biz bunday tartibga solishga muhtojmiz", dedi Shlezvig-Golshteyn bosh vaziri.

Siyosatchi yoshlar o‘rtasida zo‘ravonlik kuchayib borayotganini ta’kidladi. "Ba’zi hollarda 15, 16 yoshli va undan kichik yoshdagilar boshqalarga qurol bilan hujum qilmoqda. Agar biz qattiqroq qoidalar joriy qilsak, buni nazorat ostiga olishimiz mumkin. Bu erkinlikni cheklash emas, aksincha", - deya xulosa qildi Gyunter.